Bahan Khotbah 1 Yohanes 5:1-6

Ev. 1 Johanes 5:1-6                 Ep. Psalmen 98:1-9                 S.Patik. 2 Korint 13:5

 I.             Patujolo

Rogate na marlapatan ma i “martangiang”. Ia surat 1 Johanes on digurithon si Johanes sandiri ima sada sian sisean ni Jesus. Surat ni si Johannes naparjolo ima taringot tu panindangion ni si Johannes namandok Anak ni Debata do Jesus jala Ibana do Kristus i, Jesus Kristus do panondang dohot hasintongan namangondihon hita saor tu Debata, suang songoni nang parsaoranta di huria marhite nasada daging hita dibagasan Kristus (1 Kor 12:12-27). Ia si Johanes digoari do dirina “saksi mata” diangka ulaon ni Jesus (1 Joh. 1:1-3), jala surat on ditujuhon ibana tu halak Kristen na adong diparserahan (diaspora) na di Asia nametmet. Molo tapamanat sian bindu-bindu naparjolo sahat tu turpukta sadarion boido botoonta songon dia parngoluan parhuriaon dihatihai mansai godangdo angka panurirang pargagap di hatiha i ima angka naso porsea na Jesus do Mesias Anak Debata Nabadia jala naolo marsaor tu portibi nagok dosa on (ajaran Doketisme). Manang ise naso porsea di Jesus Kristus ndang porsea i di Debata. Debata do Kristus Jesus naung ro tu portibion na gabe rumang tu jolma laho manobus hita sian dosa (Plp 2:5-8). Sian ruasni huria i do angka panurirang pargagapi naung mambahen sada punguan namarpangunsandean tu angka pikiranna sandiri jala manganggap nasida do naumpistar (ajaran Gnostik). Nasida do naummalo molo taringot tu hatani Debata menurut pingkiran nasida alai ndang di haporseai nasida na Jesus do Kristus Anak ni Debata. Dianggap nasida do halaki naumbadia alai ndang adong holong dapot dinasida. Tontu sahali maralo situtu do pangajarion/pangantusion si songon i tu ajaran naung di ajarhon Jesus. Dibaheni do disurat si Johannes suraton laho pahothon dohot patoguhon haporseaonni huria i laho manghatindangkon Jesus Kristus di nasa ngoluna.

II.          Hatorangan ni Turpuk

Ai nasa natinogihon ni tondi ni Debata, angka ido anak ni Debata (Rm. 8:14). Halak na porsea jala namanghatindangkon na Jesus do Kristus anak ni Debata, ima namanghaholongi marhite-hite pangoloion dohot mangulahon patikni Debata dibagasan parngoluanna. Pangoloion nanidokna dison ima namambahen Jesus Kristus nagabe partunggul di parngoluanna jala holan Jesus Kristus do dipangasahon disude gulmit ni ngoluna. Ihut tusi, nasa na porsea di Jesus Kristus jala mangkaholongi Debata, ingkon do marsihaholongan. Didok di ayat 1 “ Ganup na porsea, Jesus do Kristus, ido naung tubu sian Debata, jala ganup na mangkaholongi Ibana na manubuhon, haholongan ni i do nang na tubu sian Ibana”. Tung maralo situtu do pandohan on tu pangantusi on ni halak Jahudi  na mandok  holan nasida do panean dipasupasu ni Debata songon naung jinanjihonNa tu si Abraham dipadan narobi jala Songon na tarsurat di Roma 9:4-7. Holong na sian Debata ima holong napolin naso marpambuat. On ma sada sipatuduhononta tudongan jolma paboa nasiihuthon Kristus hita asa tong dohot nasida mananda Jesus Kristus marhite holong natabahen. Haporseaon ni halak Kristen nasintong ima haporseaon namarpusur tu Jesus Kristus, haporseaon dohot panindangion tu Jesus Kristus do nagabe sinjata laho manaluhon portibion.

Molo adong do holong nasian Debata dohot haporseaon natogu monang ma hita maralohon portibion. Molo dihaholongi jolma i do Debata, na ingkon haholonganna do tongtong angka natibubuhon ni Debata, ima Jesus jala angka jolma siihuthon Jesus. Panghaholongionta di Debata, ndang marombas ombas, alai ingkon dibagasan hasatiaon dohot las ni roha do. Jala manghaholongi Debata dibagasan hasatiaon dohot las ni roha tarida doi sian pangaradotionta dipatikNa. Lehonon ni Debata do tu hita gogo marhite Tondi Parbadia laho manghatindanghon na Jesus Kristus do Anak ni Debata naung pamonanghon hita sian dosa. Molo tongtong do hita di bagasan Kristus jala Kristus di bagasan hita mangolu ma hita di bagasan haporseaon dohot holong nasian Debata, jala ndang olo be hita diela-ela namasa di portibion alana Jesus do tapangasahon di bagasan ngolunta. Parbue ni haporseaon do na marsihaholongan. Saotik mangutip bahasa Indonesia na mandok: Iman yang benar menghasilkan pertobatan yang benar, pertobatan yang benar menghasilkan perbuatan yang benar. Marhite pambahenan dohot parange na denggan do pataridahon na porsea hita di Jesus Kristus ndang sae holan alani na ringgas manangihon hata ni Debata di partangiangan, alai naeng ma ngoluntaon na gabe jamita laho manindangi na Jesus Kristus do Anak ni Debata. Sian pangalaho dohot sian parngoluanta do pataridahon hita na porsea di Jesus Kristus, ima marhite na mangihuthon dohot mangoloi Jesus (meneladani). Angka si panindangi Kristus Jesus ima angka naung marsaor dohot Debata marhite-hite pandidion nabadia jala angka naporsea di Jesus Kristus naung mate di hau pinarsilang, naung hehe sian namate laos manaek tu Surgo laho paradehon inganan diangka namonang rap dohot Jesus. Porsea do hita na Tondi ni Debata do mangalehon gogo laho manghatindanghon Jesus Kristus di portibion. Tondi na sian Debata do tong namangajari di bagasan hasintongan nasian Debata. Tanda ni haporseaon tu Debata ima namangaradoti dohot mangulahon patikni Debata di parngoluanna. Namangihuthon hatani Debata ima na manghaholongi dongan jolma (patangkas Jak. 2:17). Alani i, mian ma hita dibagasan Ibana, asa dapotan pasupasu dohot las niroha hita sian Ibana. Amen.

 

Ende

  1. BE. No. 14:1-3
  2. BE. No. 27:6+8
  3. BE. No. 20:2+5
  4. BE. No. 362:1+3
  5. BE. No. 467:1……
  6. BE. No. 184:1+3
  7. BE. No. 392:1……

Ginurithon ni: Cal. Pdt. Samsir Gunawan Sipahutar, S.Th

Melayani di HKI Unong Manik, Resort Hutabayu

About these ads

Berikan Balasan

Isikan data di bawah atau klik salah satu ikon untuk log in:

WordPress.com Logo

You are commenting using your WordPress.com account. Logout / Ubah )

Twitter picture

You are commenting using your Twitter account. Logout / Ubah )

Facebook photo

You are commenting using your Facebook account. Logout / Ubah )

Google+ photo

You are commenting using your Google+ account. Logout / Ubah )

Connecting to %s

Ikuti

Get every new post delivered to your Inbox.

%d blogger menyukai ini: